Русија подготвува офанзива врз Украина која би вклучувала до 175.000 војници и тоа веќе следната година, тврди The Washington Post.
Москва се подготвува да почне офанзива со „100 баталјони составени од тактички групи со проценета сила од 175.000 луѓе“, а во офанзивата ќе бидат вклучени и тенкови, артилерија и друга опрема, изјавил за весникот неименуван висок американски функционер.
Пентагон одбил да ги коментира информациите, но изразил голема загриженост поради „агресивните планови на Русија против Украина“, пренесува Beta.
– Продолжуваме да поддржуваме намалување на тензиите во регионот и дипломатско решение на конфликтот во Источна Украина, изјави портпаролот на Пентагон, Тони Семелрот.
Руските сили сега се концентрираат на четири различни локации со 50 борбени тактички групи, тврди The Washington Post, повикувајќи се на еден американски воен документ.
Претседателите на САД и Русија, Џозеф Бајден и Владимир Путин, наскоро треба да разговараат за тензиите околу Украина на видеосредба, седум години по руската анексија на полуостровот Крим и бунтот на проруските сепаратисти во источниот дел на Украина.
