YouTube воведе нова функција која им овозможува на корисниците да ремиксираат музички видеа и да ги претвораат во Shorts.
Новата функција овозможува да приспособите различни параметри, од цело музичко видео до создавање на нешто сосема уникатно. Ако ова ве потсетува на TikTok, дефинитивно има причина.
За користење на новата функција потребно е да се допре копчето remix на музичкото видео, по што ќе бидат понудени четири опции: Sound, Green Screen, Cut и Collab, со тоа што може да се избере само една од нив. Алатката Sound го извлекува звукот и му овозможува на корисникот да го користи за сопствен YouTube Short. Ова е многу популарно на TikTok, со многу корисници кои синхронизираат усни со различни аудио клипови. Оваа алатка за звук е достапна за секое музичко видео и повеќето песни автоматски поставени на платформата.
Green Screen оди чекор понатаму и го претвора видеото во позадина, со која корисникот може да танцува или да прави нешто друго. Алатката Cut отсекува само клип од 5 секунди од видеото, кој потоа може да се додаде на кој било Short.
Конечно, функцијата Collab создава side-by-side видео, што всушност е корисничка снимка поставена заедно со оригиналната содржина. YouTube вели дека ова е совршена опција кога „вие и вашите пријатели сакате да ја покажете кореографијата со оригиналниот изведувач“.
Функцијата е веќе достапна во мобилната апликација, иако можеби не стигнала до сите корисници.
За да проверите, стартувајте ја апликацијата, кликнете на музичкото видео и побарајте ја опцијата remix. Треба да се каже дека многу од овие функции се веќе достапни за креаторите на Shorts, но не во еден практичен таб.