Високиот крвен притисок е еден од седумте најголеми фактори кои придонесуваат за срцеви заболувања.
Веројатно сте запознаени со фактот дека исхраната со малку натриум и богата со калиум е важна за намалување на крвниот притисок, но се покажува дека некои зачини можат да помогнат во тоа.
Според студија објавена во American Journal of Clinical Nutrition, луѓето кои јаделе повеќе билки и зачини, особено цимет, куркума и оригано, пријавиле пониски вредности на крвниот притисок 24 часа подоцна.
Резултатот, се разбира, треба да се земе со резерва, имајќи предвид дека во студијата учествувале само 71 лице, на возраст од 30 до 75 години. Сепак, резултатите би можеле да поттикнат идни пообемни истражувања на оваа тема.
Секое од тие 71 лице имало барем еден фактор на ризик за развој на срцеви заболувања и спаѓа во категоријата на прекумерна тежина или гојазност. По 12-часовен пост им биле измерени крвниот притисок, висината, тежината, обемот на половината, шеќерот во крвта и флексибилноста на артериите. Потоа носеле апарати за мерење на крвен притисок во следните 24 часа.
Учесниците беа поделени во три групи: исхрана со малку зачини (0,5 грама на ден), умерено зачинета исхрана (3,3 грама на ден) и исхрана богата со зачини (6,6 грама на ден).
Истражувачите откриле дека исхраната богата со зачини резултирала со поздрави 24-часовни отчитувања на крвниот притисок. Холестеролот, шеќерот во крвта, артериската функција и другите категории не се промениле.
„Ефектите на билките и зачините врз намалувањето на крвниот притисок во просечната западна исхрана за мене беа изненадувачки. Ова е целосна новост“, изјави за Medical News Today една од водечките автори на студијата, Пени Крис-Етертон.
Натриумот, алкохолот и кофеинот можат да го зголемат крвниот притисок, додека калиумот, магнезиумот, калциумот, слабеењето, физичката активност и некои витамини, вклучително и фолатите и витаминот Д, го намалуваат.
