Комбето кое ја превезувало екипата на серијата „The Chosen One“ на Netflix учествувало во сообраќајна несреќа во која загинале двајца актери, а шестмина се повредени. Тажната вест ја потврди и самиот Netflix, објавувајќи дека снимањето на серијата е паузирано.
Актерите Рајмундо Гардуњо Крус и Хуан Франсиско Гонсалес Агилар загинаа од повредите здобиени во сообраќајна несреќа на полуостровот Јужна Долна Калифорнија во истоимената сојузна држава во Мексико.
„Со жалење потврдуваме дека двајца актери загинаа по трагичната несреќа на пат од Санта Росалија до локалниот аеродром“, се вели во соопштението. „Уште шестмина од нив се повредени, но се во стабилна состојба. Во тек е истрага за причините за несреќата, а продукцијата е прекината на неколку дена поради почит кон жртвите. Нашите мисли се со нив и нивните семејства“.
Медиумите објавија дека комбето се превртело откако излетало од патот во пустинска област додека екипата патувала за Санта Росалија, каде се снима серијата.
Споменатите актери загинале на местото на настанот, а идентитетот на останатите шестмина повредени сѐ уште не е познат.
Инаку, серијата „The Chosen One“ е адаптација на стрип на Марк Милар и Питер Грос, а според описот на Netflix, заплетот се врти околу 12-годишно момче кое дознава дека е предодреден за Христовото доаѓање и спасување на човештвото.
Серијата почна да се снима во април во Мексико, а датумот на прикажување сѐ уште не е потврден.