Полскиот напаѓач Роберт Левандовски повтори дека сака да го напушти Баерн, предупредувајќи дека Баварците не треба да го спречат во тоа.
Тој нагласи дека се чувствува како затвореник во германскиот клуб.
Левандовски во неодамнешното интервју изјави дека повеќе нема да игра за Баерн и дека е сигурен дека клубот ќе го пушти во тој поглед, сметајќи на Барселона да го плати бидејќи е обврзан со договор до 2023 година.
Сепак, Баварците не се откажуваат од своите намери и не сакаат да го пуштат туку-така, па јасно е дека нè очекува турбулентно лето кога е трансферот на Левандовски во прашање.
„Мојата намера е да го напуштам Баерн, тоа е сигурно. Лојалноста и почитта се поважни од работата, но и онака не сакаат да ме слушаат. Отсекогаш сум му бил на располагање на клубот и мислам дека е најдобро да се најде решение кое одговара на секого. Не може да донесете еднонасочна одлука“, изјави полскиот напаѓач и додаде:
„Нешто умре во мене, сакам да си одам за да доживеам повеќе емоции. Кој би сакал сега да оди во Баерн, знаејќи што ми прават?“, додаде Левандовски, кој се смета себеси за затвореник на клубот.
Договорот на Левандовски со Баерн трае до јуни следната година, а најголем интерес за неговиот потпис покажа Барселона, каде што Полјакот е подготвен да замине. Германскиот шампион претходно најави дека Левандовски може да замине во Барселона, но само за 50 милиони евра, но можно е на крајот да побараат и помала сума.
