Летниот преоден рок е затворен за сите земји од петте лиги и во наредните денови ќе бидат дозволени трансфери само за оние играчи кои не се договорно врзани за ниту еден клуб.
Во изминатите два месеци бевме сведоци на многу интересни случувања и шпекулации во странскиот фудбал.
Во однос на најскапите трансфери, на топ листата очекувано доминираа англиските и шпанските гиганти. Челси е единствениот клуб со две засилувања во десетте најскапи трансфери ова лето, а тоа се доаѓањата на Весли Фофана и Марко Кукурела, кои ја засилија одбраната на лондонскиот клуб за вкупно повеќе од 140 милиони евра.
Најскапиот трансфер летово е трансферот на крилниот напаѓач Антони од Ајакс во Манчестер Јунајтед за нешто помалку од 100 милиони, а потоа следуваат Фофана, Аурелиен Чоамени, Дарвин Нуњес и Касемиро. Топ 10 заедно со Кукурела го затвораат Александер Исак, Матијс де Лигт, Ерлинг Холанд и Ричарлисон.
Саутемптон денеска донесе трет играч
Саутемптон веќе ги објави доаѓањата на Самуел Едози и Ејнсли Мејтланд-Најлс. Станува збор за крилен напаѓач кој дојде од Сити и сестран играч за врска од Арсенал. Сега е најавено доаѓањето на 18-годишниот дефанзивец Хуан Лариос од Сити.
Депај одлучи да остане
Мемфис Депај реши да остане во Барселона и тоа го објави на својот Twitter профил. Летово нема да биде ништо од транферот во Англија, што најверојатно значи дека Барселона не може да си дозволи повеќе влезни трансфери со исклучок на Маркос Алонсо кој би можел да дојде како дел од договорот за преселба на Обамејанг во Челси.
Арсенал испрати трета понуда за Луис
Арсенал испрати трета понуда за Даглас Луис, овојпат за 29 милиони фунти. Дефанзивниот играч за врска на Астон Вила според Transfermarkt вреди 38 милиони, но договорот му истекува следната година, па Арсенал сака да го доведе по намалена цена.
Кејлор Навас останува во Париз
ПСЖ не успеа да се ослободи од Кејлор Навас, кој падна во втор план по доаѓањето на Џанлуиџи Донарума. Костариканецот беше блиску до Наполи, но ништо од неговото заминување на југот на Италија.
Флоријан Грилиш во Ајакс
Флоријан Грилиш, 27-годишниот австриски играч од средниот ред е нов играч на Ајакс. Тој пристигна во Холандија како слободен играч. Неговиот договор со Хофенхајм истече пред неколку месеци.
Дест официјално во Милан
Милан официјално го претстави Сержињо Дест. Американско-холандскиот бек од Барселона дојде на позајмица со право на откуп во износ од 20 милиони евра.
Френки де Јонг останува во Барса
Френки де Јонг ова лето дефинитивно нема да ја напушти Барселона. Да потсетиме, клубот уште му должи огромен дел од платата на холандскиот играч за врска и сакаше да се ослободи од него, но Де Јонг сепак успешно се избори да остане бидејќи не беше заинтересиран да оди во Премиер лигата.
Галатасарај ги договори условите со Икарди
Мауро Икарди ги договори сите услови од договорот со пропаднатиот турски гигант Галатасарај, но Турците и ПСЖ останува да се договорат за обештетувањето за Аргентинецот.
ПСЖ официјално го објави доаѓањето на Солер
ПСЖ на својата официјална веб-страница го потврди доаѓањето на играчот за врска Карлос Солер од Валенсија.
