Украинскиот претседател Володимир Зеленски се надева дека тој и швајцарската претседателка Виола Амхерд за неколку дена ќе одредат датум за светски мировен самит во Швајцарија, на кој треба да присуствуваат од 80 до 100 земји.
Киев претходно предложи одржување на светски мировен самит, но рече дека Русија нема да биде поканета, додека официјална Москва рече дека таков самит ќе биде бесмислен без нејзино учество.
Во телевизиско интервју емитувано во саботата, Зеленски рече дека тој и швајцарската претседателка ќе треба да се договорат за датум и потоа да испратат покани до светските лидери.
„Очекуваме да имаме од 80 до 100 земји. Ова е бројот на земји, верувам, кои ќе можат барем да се обидат да ја натераат Русија на фер мир“, рече тој.
Во интервјуто, снимено за време на посетата на регионот Черниговски, Зеленски рече дека тие сè уште немаат конкретен список на земји.
„Ќе се договориме за ова во наредните денови. Се надевам за неколку дена, а не недели“, рече Зеленски.
Запрашан за улогата на Турција, Зеленски рече дека е благодарен на турскиот претседател Реџеп Тајип Ердоган за неговата поддршка и подготвеност да посредува, нагласувајќи дека Турција има и други интереси и силни односи со Русија.
„Турција како посредник не ни е доволна“, рече Зеленски, додавајќи дека форматот на самитот ќе биде многу сложен, со оглед на многуте интереси на многуте земји вклучени на самитот, вклучително и историските и современите односи со Русија и Европа.
