Приватни вселенски компании работат напорно за да ја пополнат орбитата на нашата планета со огромен број сателити. Меѓу нив, компанијата SpaceX се издвојува со својата серија сателити Starlink, кои на крајот треба да се состојат од неколку десетици илјади објекти, од кои секој тежи околу 260 килограми.
Во саботата беше лансиран сателитот BlueWalker 3, кој е толку голем што би можело да биде посјаен од кое било друго тело на ноќното небо, освен Месечината. Овој факт особено ги загрижи астрономите и љубителите на ноќното небо. Имено, ново лансираната серија сателити веќе пречат на научните набљудувања од Земјата и некои радио сигнали, пишува Futurism.
BlueWalker 3 е изграден од AST SpaceMobile со седиште во Тексас. Тој е дизајниран за тестирање на мобилната технологија, вклучувајќи 4G и 5G интернет. Тоа е најголемиот комерцијален комуникациски сателит некогаш лансиран, тежок околу 1.500 килограми.
Подоцна, компанијата има намера на неа да постави антена долга осум метри, односно огромен рефлективен објект кој прилично ги вознемирува астрономите бидејќи BlueWalker 3 би можел, за време на неговото поминување, практично да ги засени сите околни ѕвезди и планети на ноќното небо.
„Загрижени сме. Тоа би можело да биде најсветлиот објект на ноќното небо, потенцијално посветол од Венера“, вели астрономот Џон Барентин од Dark Sky Consulting во Аризона, според New Scientist.
„BlueWalker 3 може, додека испраќа податоци од орбитата до нечиј мобилен телефон, да создаде проблеми за радиоастрономската опрема. Ние сме загрижени за количината на енергија што ќе ја емитува“, додаде тој.
Уште полошо, AST SpaceMobile планира во иднина да лансира повеќе од 100 сателити наречени BlueBirds, кои се двојно поголеми од BlueWalker 3.
„Колку овие објекти се посветли, толку повеќе ќе им нанесат штета на сликите на ноќното небо. Повеќето астрономи го прифаќаат фактот дека во иднина ќе има се повеќе и повеќе сателити. Она што тие го сакаат е мирен соживот. Се разбира, сателитите не можат да станат невидливи “, рече Барентин.
BlueWalker 3 беше испратен во вселената од компанијата SpaceX со нејзината ракета Falcon 9. Сателитот беше лансиран во саботата навечер од платформата 39A на вселенскиот центар Џон Г. Кенеди (KSC) на НАСА во Флорида.
