Дури 24 бродови, кои биле потопени за време на битката кај Иво Џима, во која Американците и Јапонците се судриле во последните месеци од Втората светска војна, испливаа од морското дно до брегот на тој јапонски остров.
Причина за ненадејната појава на потонатите бродови е движењето на морското дно поради активноста на вулканот Сурибачи, кој предизвикал тектонски поместувања.
На снимката објавена од јапонската телевизиска мрежа ANN се гледаат остатоците од трупот на 24 транспортни бродови кои биле заробени од Американците, а потоа преместени во западниот дел на Иво Џима за да послужат како основа за формирање на пристаништа бидејќи во тоа време на островот не постоеле.
Овие јапонски бродови служеле како еден вид одбрана од бранови и ветер за американските бродови од кои се симнувале војници и се истоварувало оружје и опрема.
Неколку децении подоцна, сеизмичката активност на вулканот Сурибачи, кој се смета за еден од најактивните во Јапонија, го подигна морското дно, а со тоа и бродовите.
Денеска на островот нема жители, но има јапонски воени сили кои се стационирани таму откако Американците во 1968 година го вратиле островот под управа на Токио.
Островот Иво Џима е дел од архипелагот Огасавара
„Се чини дека вулканската активност сè уште не е завршена, постои можност за голема ерупција на Иво Џима“, изјави за ANN Сецуна Накада, директор на Државниот центар за вулкански истражувања.
Инаку, на Иво Џима досега се забележани најмалку 10 ерупции, а последната се случи во 1982 година. Според истражувањето на Универзитетот во Орегон, од 1952 година самиот остров се издигнал за најмалку 10 метри поради вулканска активност.