Јувентус нема по добро да го помни вчерашниот ден. Им беа одземени 10 бодови, а Емполи ги торпедираше со 4:1.
Да потсетиме, на „Старата дама“ синоќа ѝ беше потврдено дека поради скандалот со незаконски стекнатите капитални добивки ѝ се одземаат 10 бодови од нејзиното бодовно салдо стекнато во тековнава сезона, поради што сериозно ѝ е загрозен пласманот во Европа наредната сезона. Згора на тоа, ситуацијата дополнително ја искомпликуваа мотивираните играчи на Емполи со победата од 4:1.
„Тоа беше кукавички. Играчите дадоа сѐ од себе сезонава. Нормално, чудна беше ситуацијата што казната стигна 10 минути пред натпреварот. Моментално сѐ што можеме да наравиме е да замолкнеме и да го прифатиме поразот. Пред натпреварот освоивме 69 бодови и бевме втори на табелата, нека тоа биде јасно“, изјави нервозниот Масимилијано Алегри.
Многумина велат дека високиот пораз синоќа бил последица на одлуката на Судот која стигна токму пред играчите да истрчаат на теренот.
„Не можам да им замерам на играчите бидејќи ситуацијата не е лесна. Ниту идните неколку дена нема да биде лесно бидејќи испаднавме од Лига Европа, а потоа ја добивме веста за одземањето на бодовите 10 минути пред натпреварот, а три месеци како ни се одземаат и враќаат бодови. Не е оправдување, но без сомнеж ова е ненормална сезона за нас и без обѕир на тоа момците освоија 69 бодови“, додаде.
„Сакам да истакнам една работа. Јувентус е втор на табелата, тоа го заслуживме на теренот. Прифаќаме сѐ, но навистина се надевам дека еднаш засекогаш ова ќе се реши. Само нека одлучат каде го сакаат Јувентус, кажете ни и решете го проблемот. Тоа е недостаток на почит кон луѓето што работат, играчите и тренерите. Не им кажувам што да одлучат, само барам да одлучат еднаш засекогаш. Тоа е неверојатно. Едноставно неверојатно. Што е многу, многу е“.
„Сега можеме само да се надеваме дека наредената сезона ќе ја започнеме знаејќи каква е ситуацијата. Би сакал пред два месеца да ни кажеа каква е казната и да ни кажеа дали ќе бидеме избодени или отруени, бидејќи така барем ќе знаевме на што сме“, заврши лутиот предводник на „Бјанконерите“.