Разликата помеѓу Јувентус и лидерот Интер, кој има натпревар помалку, по поразот на торинскиот тим од Удинезе сега е 7 бода, но тренерот Масимилиано Алегри не помислува да се откаже од борбата за титулата.
Искусниот стручњак е свесен дека тимот од Милано има голема предност, но и дека неговиот тим не игра како што треба во последно време. Сепак, без разлика на тоа, смета дека не е сѐ загубено.
„Имавме одлична серија од пет победи во низа, а потоа следуваа три меча без победа, што никој не го очекуваше тоа од нас. Играме слабо во последно време, тоа е факт од кој не можеме да избегаме, а тоа значи дека имаме многу работи пред нас и дека треба да работиме уште понапорно од порано“, рече Алегри и додаде:
„Интер има предност, но ние не се откажуваме. На натпреварот против Удинезе научивме уште една важна и болна лекција и сфативме што не беше добро. Шампионатот е долг, има уште многу натпревари да се одиграат, а ние не се откажуваме од нашите амбиции да се бориме за Скудетото. Продолжуваме да работиме во мир и верувам дека трудот ќе се исплати“.
Удинезе синоќа само еднаш успеа да шутне во рамките на голот и со тој шут всушност ја затресе мрежата на Војчех Шченсни, кој натпреварот го заврши без ниту една одбрана. Стрелец на одлучувачкиот погодок беше Аргентинецот Лаутаро Џанети во 25. минута. Интересно, овој 30-годишен одбранбен играч сезонава прв пат игра за друг клуб откако целата кариера ја мина во Велес Сарсфилд.
На „Старата дама“ ѝ претстојат два релативно лесни меча во Серија А, прво против Верона на гости и Фрозиноне дома, пред да ги дочекаат дуелите против Наполи во Неапол и Аталанта во Торино.
Но, како што стојат работите во моментов, Јуве е поблиску до борба со Милан за второто место отколку со Интер за првото.
