Масимилијано Алегри тврди дека Јувентус нема „технички или тактички проблем, на овој тим му недостасува срце и страст“. Тренерот „никогаш“ не размислувал да си поднесе оставка.
Синоќешниот за „Бјанконерите“ беше натпревар кој мораше да се добие, но наместо тоа, беше веројатно нивниот најлош настап досега сезонава. Јуве немаше чувство на итност, немаше квалитет, тактичка интелигенција и организација на теренот, бидејќи играчите постојано дозволуваа нафрлувања дури и пред воведниот гол.
Макаби Хаифа поведе уште во 7. минута преку Омер Атзили, а истиот играч на 3 минути пред паузата го дуплираше водството, што се покажа и како конечен резултат бидејќи до крајот Јуве не успеа да направи ништо.
Како и да е, претседателот Андреа Ањели зборувајќи за Sky Sport Italia по натпреварот уверуваше дека Алегри ќе остане тренер, и покрај зголемените повици да биде отпуштен.
„Тешко е да се објасни, можеме само да молчиме, бидејќи не беше добра претстава во однос на карактерот“, изјави Макс Алегри, исто така за Sky Sport Italia.
„Мораме да излеземе од оваа ситуација и да молчиме. Утре се враќаме во Торино и остануваме во тренинг-центарот Континаса сѐ до дербито. Не станува збор за техничко или тактичко прашање, на овој тим му недостасува срце и страст. Играме премногу како поединци, треба повторно да станеме тим“, додаде стратегот на Јуве практично префрлувајќи ја вината кон играчите.
Ањели рече дека Јувентус треба да се „засрами“ од овој настап во Хаифа.
„Во право е, ова беше нашето најлошо прво полувреме. Одвреме-навреме помага да се затвори тимот во тренинг-центарот, имаме повеќе време за работа. Не е во ред да се игра вака“.
Алегри беше прашан дали некогаш размислувал да си поднесе оставка.
„Не. Кога предизвикот станува тежок, тој е уште повозбудлив. Мораме да излеземе од ова со храброст и глад“.
