Холивудската актерка Анџелина Џоли отпатува во Украина каде го посети Лавов, град во кој минатата недела во ракетен напад загинаа седум лица.
Актерката и голема хуманитарка е една од најпознатите ѕвезди кои ја посетија Украина во текот на руската инвазија, со цел да даде поддршка. На социјалните мрежи е објавена дури и снимка како актерката со нејзината придружба трча во засолниште додека се слуша сирена за воздушен напад на Лавов.
Иако овој град до неодамна се сметаше безбеден за бегалците кои бегаат во Полска, во последните неколку недели не е така. Актерката и луѓето со неа сепак успеаја да се засолнат.
Во текот на посетата, Џоли се запозна со бегалци од Донабс, а луѓето дури и побараа автограм кога беше забележана во кафуле во Лавов.
Џоли ги посети децата кои се лекуваат во болницата во Лавов, а беа повредени во ракетниот напад на железничката станица во Краматорск на почетокот на април. Таа ги посети и домовите за сирачиња, центрите за рехабилитација и пунктот за дистрибуција на помош.
„Сите се во некаков шок. Знам како траумата влијае на децата. Треба само некој да им покаже колку се важни, колку е важен нивниот глас, знам колку е тоа лековито за нив“, изјави Џоли.