Дерби натпреварот на осминафиналето на ова Европско првенство ѝ припадна на репрезентацијата на Англија која со 2:0 ја победи и елиминира Германија.
По навидум едно досадно прво полувреме без шанси и тврда игра од двете страни, Англичаните и Германците се разбудија во вториот дел.
Во 75. минута Лук Шо одлично му сервираше на Рахим Стерлинг кој од пред гол само ја турна топката во мрежата на немоќниот Мануел Нојер за ерупција на „Вембли“.
Набрзо потоа Томас Милер се најде во идеална позиција еден на еден со домашниот голман Џордан Пикфорд, но успеа да го промаши голот прокоцкувајќи идеална шанса за израмнување.
Казната стигна во 86. минута кога резервистот Џек Грилиш му нафрли на Хари Кејн, а најдобриот стрелец во Премиер лигата со глава ја запечати победата.
Германија неславно го заврши континенталниот собир и воедно ерата на селекторот Јоахим Лев чија 15-годишна авантура дојде до својот крај. Воедно, Англичаните слават слатка одмазда на која чекаа 25 години. Имено, на ЕУРО 1996 година, исто така на „Вембли“, но на оној стариот пред реновирањето, Германија на пенали со 6:5 ја победи Англија тогаш во полуфиналето и подоцна дојде до пехарот и стана европски шампион.
Англиските навивачи на крилјата на победата во еден глас ја пееја „It's coming home“, песната кога беше химна на првенството во 1996.
Во четвртфиналето Англија ќе се сретне со подобриот од вечерашниот дуел на Шведска и Украина.
