Француските медиуми објавија дека постои можност Килјан Мбапе (25), Оливје Жиру (37) и Антоан Гризман (33) да бидат дел од олимписката репрезентација на Франција.
На олимпискиот турнир можат да играат фудбалери до 23 години и тројца постари играчи. Селекторот на олимписката репрезентација на Франција, Тјери Анри, сака тие три места да ги поплнат искусни играчи од сениорската селекција.
Проблемот е што Олимписките игри не се во календарот на ФИФА и клубовите немаат обврска да ги пуштат играчите на олимпискиот турнир кој ќе трае од 24 јули до 10 август.
Француските клубови се обврзаа да ги ослободат сите играчи што ќе ги повика Анри, сепак, голем знак прашалник е колку странските клубови се подготвени да го направат тоа, особено гигантите во кои играат Гризман (Атлетико) и Жиру (Милан), додека Реал сигурно ќе има големи планови со Мбапе кој летово треба да се пресели во Мадрид.
Франција има играно на 13 олимписки турнири. Има освоено еден златен медал од Олимписките игри 1984 година во Лос Анџелес, кога прво во полуфиналето ја победи Југославија со 4:2, а потоа Бразил со 2:0 во финалето.
