Марко Арнаутовиќ ѝ даде гол на Бенфика синоќа во 53. минута и тој удар предизвика лавина на Интер на гостувањето во Португалија бидејќи од 3:0 негатива „Нераѕурите“ направија 3:3, но тој гол за Австриецот не е како било кој друг.
Не поради начинот на кој го постигна, бидејќи така често се тресат противничките мрежи ширум фудбалските терени, туку поради фактот што со него собори еден неславен рекорд во елитниот европски фудбал.
Имено, тоа беше првата искористена шанса за Австриецот во Лигата на шампионите по точно 4.740 дена голгетерски пост за напаѓачот роден пред 34 години.
Последен пат кога поранешниот шпиц на Болоња, Вест Хем, Твенте, Стоук... погоди во европската елита беше во 2010 година кога беше стрелец во дресот на Вердер. Интересно, токму тој гол за Вердер Арнаутовиќ го постигна против Интер кога тимот од Бремен победи со 3:0 на 7 декември 2010 во последното коло од групната фаза. Австриецот стрелаше за 2:0 во 49. минута во пировата победа на последнопласираниот Вердер. А, претходната сезона играше за Интер како позајмен од Твенте.
Од тој 7 декември 2010 до 29 ноември 2023 поминаа точно 12 години, 11 месеци и 20 дена, или во самно денови 4.740.
Бројките се тие, поминаа точно 4.740 дена помеѓу двата гола, но треба да се има предвид и олеснителната околност за Арнаутовиќ, а тоа е фактот што освен таа сезона за Вердер всушност и не играше во Лигата на шампионите сѐ до враќањето во Интер летоска, 13 години подоцна.