Двата клуба постигнале договор за напаѓачот да оствари трансфер во Катлонија и тоа без никаква отштета.
Пјер-Емерик Обамејанг во последен момент пред истекот на преодниот рок го комплетираше преминот во Барселона ставајќи крај на 4-годишната авантура во Арсенал.
Првично работите одеа во правец Габонецот да замине на позајмица во Барселона, но очигледно Арсенал се одлучи што побрзо да се ослободи од неговата плата која изнесува 350.000 фунти неделно. Неговиот договор со „Топчиите“ беше до јуни 2023.
Габонскиот голгетер од 6 декември не игра за Арсенал откако доби суспензија и му беше одземена и капитенската лента. Потоа фати ковид поради што го пропушти Африканскиот куп на нации откако по прележувањето имаше проблеми со срцето.
Она што е јасно е дека Обамејанг се согласил на драстично намалување на платата бидејќи поради финансиската криза Барса не може да си дозволи вртоглави плати. Згора на тоа клубот не успеа да го продаде Усман Дембеле кој и натаму ќе мора да го плаќа, а бидејќи на лето му истекува договорот ќе си замине без Барса да ќари нешто.
Се очекува во текот на денешниот ден Барселона официјално да го претстави Обамејанг.
