Каталонскиот гигант изненади многумина со едноставноста на третиот дрес со кој ќе игра во веќе започнатата нова сезона, а ќе дебитира уште вечерва на пријателска против Манчестер Сити.
Ако дизајнерите во клубот се осврнаа на Летните олимписки игри во 1992 година кои се одржаа токму во Барселона и оттаму ја исцрпија инспирацијата за новите домашни и гостински дресови, за третиот дрес постапија поинаку. Имале за цел да ја покажат клупската посветеност на социјалните борби, различноста и инклузивноста, заедно сплотени во едноставен дизајн.
Дресот не ја следи традицијата на вертикални риги, туку има голем црвено-син крст на средината. На средината на дресот се наоѓа логото на спонзорот Spotify, а на градите знакчето на Nike и, нормално, клупското лого.
Објаснувањето за крстот е дека тој е таму како посвета на Крстот на Свети Жорди, награда која клубот ја има добиено за своите заложби во подобрување на општеството и водечката улога во промоцијата на спортот, како и спортските вредности, граѓанските должности и солидарноста.
Овој необичен дрес на Барселона веќе е достапен за онлајн нарачки на официјалната клупска веб-страница, а за оригиналната верзија за натпревари ќе треба да издвоите 139,99 евра, ддека за онаа за навивачи 89,99 евра. Додаден пач Лига на шампиони на ракавот ќе ја направи навивачката верзија 104,99 евра, оригинална верзија со име на играч и бројка е дури 159,99 евра, додека за шорцевите ќе треба да платите 39,99 евра.
