Неславна проверка имаше новиот американски клуб кој загуби со високи 6:0 од славната Барселона на пријателски натпревар.
Американската турнеја Барселона ја почна силовито, со голема победа над клубот чиј сопственик е Дејвид Бекам - Интер Мајами. Натпреварот се одигра на „Драјв Пинк“ стадионот во Форт Лодердејл на Флорида, кој е и дом на Интер Мајами.
Кај каталонскиот клуб најмногу се истакна Рафиња кој пред само неколку дена му се приклучи на тимот. Го одигра првото полувреме и веднаш покажа дека ќе биде големо засилување за тимот на Чави Ернандес. Во 19. минута му асистираше на Пјер-Емерик Обамејанг за првиот гол, потоа во 25-тата самиот погоди за 2:0, а во 41. минута одново асистираше, овој пат за младиот Ансу Фати за 3:0.
За време на паузата Чави ја промени комплетната постана на Барса, но голеадата продолжи. Гави во 55. минута, Мемфис Депај во 69-тата и Усман Дембеле во 70-тата се погрижија натпреварот да заврши со високи 6:0.
За домашниот тим првото полувреме го одигра Гонсало Игуаин, кој беше тотално немоќен, додека на 4 минути пред крајот натпреварот го почувтствува и синот на Дејвид Бекам, 19-годишниот Ромео Бекам.
Интер Мајами во американската МЛС по 21. коло е на 9. место во Источната конференција со 25 бода и скор од 7 победи, 4 ремија и 9 порази.
Барса во САД продолжува в недела кога во Лас Вегас ќе игра Ел Класико против Реал Мадрид. Потоа следуваат натпревари со Јувентус, Њујорк Ред Булс и мексиканскиот УНАМ.
