Барселона е во потрага по нов тренер кој ќе го наследи Чави Ернандес на клупата, откако поранешниот играч за врска на Каталонците ќе го напушти клубот во јуни.
Како што пренесуваат Cadena SER и AS, спортскиот директор на Барселона Деко смета дека поранешниот тренер на Каталонците Луис Енрике е идеалниот кандидат за функцијата тренер на клубот од стадионот Камп Ноу.
Според информациите на AS, потпишувањето на тренерот на ПСЖ е голем сон на Деко, а на идејата позитивно гледа и самиот претседател Жоан Лапорта.
Неговиот договор со ПСЖ трае до 2025 година, а доколку Барса го донесе една година пред истекот на договорот, Парижаните сигурно ќе бараат висока отштета, што е огромен проблем за Каталонците кои имаат финансиски проблеми.
Од друга страна, се поставува прашањето дали Луис Енрике, кој со Каталонците во 2015 година ја освои Лигата на шампионите, воопшто сака да си замине од Париз и доколку овој обид не успее, ќе се насочи кон други решенија.
Германците Ханси Флик, Јулијан Нагелсман и Томас Тухел, како и Италијанецот Роберто де Зерби се високо на листата за тренер на Барселона.