Цената на струјата најверојатно нема да се покачи за 13% како што бараат дел од компаниите. Ова го посочува министерот за економија Крешник Бектеши, потсетувајќи дека и минатата година дел од компаниите бараа зголемување и до 100%. Тој повтори дека конечната одлука ќе ја донесе Регулаторната комисија за енергетика.
„Претходната година, енергетските компании бараа зголемување, ако се сеќавате на 78%, па надминаа и над 100% некои компании. Не е важно колку бараат тие, важно е колку ќе се одобри од Регулаторната комисија за енергетика и која ќе биде цената која ќе ја утврди Владата на ЕСМ, која ќе ја даде кон универзалниот снабдувач, во овој случај ЕВН, цена која важи за домаќинства и мали потрошувачи. Тоа значи дека 13% зголемување, кое е барање од страна на енергетските компании, најверојатно нема да се прифати. Јас можам да кажам дека нема да се прифати цената што би можело да ја бара ЕСМ, а работа на Регулаторната комисија за енергетика на направи калкулации за барањето од страна на МЕПСО и другите компании“, рече Бектеши.
ЕСМ засега нема побарано од Владата да се утврди цена со која ќе учествува на тендерот.
„Цената која ја нуди ЕСМ на ЕВМ Хоме се разгледува на затворена седница на Владата. Откако ќе имаме барање од ЕСМ, ќе бидете известени навремено. Тоа ќе биде согласно интересите на граѓаните и заштита на животниот стандард. Немаме сѐ уште информација од ЕСМ до Владата, за да Владата утврди цена со која ќе учествува на тендерот“, додаде Бектеши.
Претходно, Бектеши посочи дека за раѓаните, цената на струјата нема да поскапи во наредните шест месеци.
