На вчерашниот референдум во Белорусија е одобрен нов устав со кој земјата се откажа од нејзиниот ненуклеарен статус, во време кога од територијата на оваа поранешна советска република руските трупи ја напаѓаат Украина.
Според белоруската Централна изборна комисија, 65,2 % од луѓето кои излегле на референдумот гласале „за“.
Новиот устав овозможува нуклеарно оружје на белоруска територија за првпат откако земјата се откажа од него, по распадот на Советскиот Сојуз. Вчера, говорејќи на избирачко место, претседателот Александар Лукашенко изјави дека би можел да побара од Русија да го врати нуклеарното оружје на Белорусија.
„Ако Западот префрли нуклеарно оружје во Полска или Литванија, на нашите граници, тогаш ќе му се обратам на Путин да го врати нуклеарното оружје кое претходно го дадов без услови“, изјави Лукашенко.
Референдумот поттикна антивоени протести во неколку градови, а најмалку 290 луѓе се приведени.
Уставот исто така му обезбедува на претседателот доживотен имунитет од казнен прогон.
