Францускиот напаѓач Карим Бензема (35) го потпиша главниот дел од документите за да стане нов играч на Ал Итихад, а наскоро се очекува и официјална потврда за овој трансфер, тврди упатениот новинар Фабрицио Романо.
Договорот на Бензема ќе трае до летото 2025 година и ќе вклучува опција за продолжување на уште една сезона.
Французинот во оваа прилика ќе заработува близу 200 милиони евра годишно со комерцијални зделки и поволности вклучени во оваа цена.
Карим утре со прес-конференција ќе се прости од навивачите на Реал, по што ќе замине за Саудиска Арабија.
Да потсетиме, Бензема израсна во младинскиот систем на Лион, од каде во 2005 година беше прекомандуван во првиот тим. Четири години подоцна Лион го продаде на Реал за 35 милиони евра, а актуелниот договор со мадридскиот клуб му истекува на 1 јули.
Сезонава одигра 43 натпревари за Реал во сите натпреварувања, постигна 31 гол и направи 6 асистенции.
За француската репрезентација дебитираше во 2007 година од кога забележа 97 настапи на кои постигна 37 голови.
Ал Итихад сезонава стана шампион на Саудиска Арабија завршувајќи со 5 бода пред Ал Наср на Кристијано Роналдо, што е негова 9-та лигашка титула. Со ова се квалификува во азиската Лига на шампиони, но останува до септември да видиме дали ќе игра со оглед на тоа што АФЦ во изминатите три сезони не му дозволуваше поради причини поврзани со финансирањето.