Бил Гејтс, филантроп и еден од најбогатите луѓе во светот, е позитивен на коронавирусот.
Не е јасно дали Гејтс, кој досега донираше милиони за борба против пандемијата, првпат е позитивен на COVID-19.
66-годишниот Гејтс на Twitter соопшти дека се изолирал со благи симптоми и оти примил и бустер доза од вакцината. Тој, исто така, рече дека виртуелно ќе учествува на состанок со луѓе од неговата фондација.
Со-основачот на Microsoft и мултимилијардер, минатата недела објави книга со наслов „Како да се спречи следната пандемија“ во која објасни како земјите можат да направат координирани напори за спречување на пандемии и „елиминирање на сите респираторни заболувања“.
Тој отворено зборуваше за тоа како глобалните здравствени власти треба да одговорат на пандемијата и да дистрибуираат вакцини. Фондацијата Бил и Мелинда Гејтс соопшти дека донирала милиони на организации вклучувајќи ги Гави и Светската здравствена организација за финансирање на тестирање, третман и дистрибуција на вакцини.
Во јануари, Гејтс на Twitter напиша дека коронавирусот, „штом омикрон ќе помине низ земјата, ќе може да се третира повеќе како сезонски грип“.