Познатиот ММА борец Хорхе Масвидал го најави своето враќање во октагонот на УФЦ и го „прозва“ Конор Мекгрегор.
Масвидал е уверен дека ќе се врати на борбите оваа година, иако има проблеми со законот. Тој е обвинет дека го нападнал Колби Ковингтон пред ресторан во Мајами Бич и наводно му нанел повреди на мозокот.
Двајцата ќе се појават на суд на 17 август, а судењето би можело да започне неколку дена подоцна. Сепак, Масвидал верува дека наскоро ќе се врати во октагонот.
„Гарантирам дека ќе се вратам оваа година. Сè уште не го знам датумот, тоа може да биде борба за титулата или борба што ќе ми даде шанса за таков меч“, изјави Масвидал за ESPN.
Го „прозва“ Мекгрегор кој сè уште се опоравува од повреда.
„Знае дека удрам силно и тргнувам да убијам. Не доаѓам за да се гушкам во кафезот, ќе дадам сè од себе да го убијам. Не сум голем дечко, но иако зема стероиди и секакви работи, сепак е дете. Би сакал да се борам во средна категорија, но не чекам никого. Ако сака да се бори, ќе го испердашам. Меѓутоа, ако тој не сака да се бори, тоа ќе го направи некој друг“, рече Масвидал.
