Демонстрантите во Брисел синоќа запалија полициска станица и возило за време на протестите поради смртта на Ибрахим Бари, 23-годишник со африканско потекло, кој почина откако беше приведен од полицијата.
Стотици граѓани вчера се собраа пред полициската станица во северниот дел на Брисел извикувајќи „Животите на црнците се важни“, „Правда за Ибрахим“, „Полицајци убици“.
Тие фрлаа камења кон полициската станица, а полицијата возврати со водени топови. Потоа демонстрантите го запалија влезот на полициската станица и еден полициски автомобил и ги оштетиле банкоматите и продавниците во близина.
Неколкумина демонстранти се повредени и се префрлени во болница, а поголем број се приведени.
Бари беше приведен на 9 јануари бидејќи не се придржувал до рестриктивните мерки воведени поради пандемијата со COVID-19. Тој по еден час во притвор изгубил свест и бил префрлен во болница, каде и починал.
Обвинителството покрена истрага за смртта на Бари.