Фудбалскиот клуб Македонија ЃП е првиот спортски колектив во земјава кој направи масовно тестирање при што сите играчи и вработени излегоа негативни на коронавирусот.
Со помош на Синдикатот на фудбалери на Македонија клубот од скопската населба Ѓорче Петров ги тестираше сите вработени вклучувајќи го и играчкиот кадар. Сите до еден покажале ист резултат, односно негативни на присуство на COVID-19. Теститирањето беше во целост на трошок на СФК, кој ги повикува и останатите клубови да го следат примерот на „Лавовите“. Сега овој клуб може слободно да почне со тренинзи.
„Денес ги добивме резултатите од првиот фудбалски (воопшто спортски) клуб во Македонија кој што направи тестирање на COVID-19 .
Фудбалерите, стручниот штаб и сите луѓе кои што работат во ФК Македонија Ѓорче Петров се негативни на тестот. Во текот на тековната и следната недела очекуваме и сите други клубови да нѐ контактираат и побараат тестирање на своите играчи. Со напомена дека комплетните трошоци околу тестирањето ги покрива Синдикатот на Фудбалери на Македонија.
Одважете се и тестирајте се за доброто на сите.
Спортски поздрав“, стои во објавата на СФМ.
Фудбалската сезона во најквалитетната македонска фудбалска лига сѐ уште не се знае кога и дали ќе продолжи. Во случај на реактивација, сите фудбалери од десетте клубови ќе треба да приложат доказ дека не се заразени со проблематичниот вирус.
ФФМ и прволигашите во понеделникот одржаа состанок на отворено на кој се дискутираше за можните варијанти околу доигрувањето на сезоната, како и можен прекин, а дефинитивна одлука треба допрва да биде донесена.