Чави Ернандес е новиот тренер на Барселона, потврди неговиот поранешен клуб Ал Сад на Твитер, Шпанецот се враќа дома.
„Управата го договори преминувањето во Барселона, која ја плати отштетната клаузула. Договорена е соработка во иднина, а на Чави му посакуваме многу успеси. Пред два дена нè извести дека сака да замине во Барселона, која е во криза. Имаме разбирање и не сакаме да му правиме проблеми. Тој и неговото семејство секогаш ќе бидат добредојдени во Доха“, изјави Турки Ал Али, спортски директор на Ал Сад.
Чави вчера со брат му и агентот во Доха се сретна со претставници на Барселона, со кои ги договори последните детали за враќањето на Камп Ноу. Денеска беше и кај претседателот на Ал Сад, Мохамед бин Калифа Ал Тани со кој се збогува и му се заблагодари за сè досега.
Ал Сад изминатите денови ги одолговлекуваше преговорите со Барселона, но договорот конечно е постигнат и легендата на Барселона се враќа на Ноу Камп, во тимот со кој како фудбалер освои 25 трофеи.
Чави на клупата на Барселона доаѓа на местото на Холанѓанецот Роналд Куман, кој минатиот месец доби отказ по серијата слаби резултати.
