Словенечки медиуми тврдат дека претседателот на УЕФА, Александер Чеферин ја фалсификувал неговата биографија, и врз основа на тоа станал на чело на европската куќа на фудбалот.
Чеферин наводно фалсификувал документи и претставил дека бил член на Управниот одбор на Олимпија помеѓу 2006 и 2011 година, информации кои биле неопходни за да може да се кандидира за претседател на УЕФА.
Според документацијата до која дојде словенечкиот портал Prava.si, Чеферин никогаш не бил член на управата на Олимпија во периодот од 2006 до 2011 година, како што наведува во својата работна биографија.
„Почитувана заинтересирана светска фудбалска јавност, во нашиот медиум Prava.si уште еднаш ќе ги презентираме клучните докази за случајот со лажењето на претседателот на УЕФА, Александер Чеферин. Во неговото официјално CV на официјалните страници на НЗС (Фудбалската федерација на Словенија) и УЕФА пишува дека бил член на одборот на директори на ФК Олимпија/Бежиград од 2006 до 2011 година. Сепак, авторот на оваа статија веќе откри на 5 февруари 2021 година дека Александер Чеферин лажел! А доказите веројатно ги изнесе малку ‘на свој начин’. Меѓутоа, откако го добивме записникот на Олимпија од 2006 до 2011 година, брзо сфативме дека името на Александер Чеферин не стои на ниту еден официјален документ! Каде е НЗС, полицијата, обвинителството, судството!?“, пишува порталот Prava.si кој ги објави документите до кои дојде.
Чеферин неодамна по третпат по ред беше избран за претседател на УЕФА и на оваа функција ќе биде до 2027 година.
Словенецот сè уште не реагирал на овие обвинувања кои би можело да го доведат во неволја. Истото важи и за споменатиот портал доколку се докаже дека нивните тврдења се неточни.