Челниците на Баерн по завршувањето на сезонава ќе направат целосна реконструкција на тимот. Познато е дека Томас Тухел наредната сезона нема да биде тренер на Баерн, а клубот веќе составил листа на играчи кои треба да го напуштат Минхен.
Bild ја откри трансфер листата, која претставува изненадување за германската јавност. Покрај веќе отпишаните Буна Сар и Ерик Максим Шупо-Мотинг, на листата се и Мануел Нојер, Свен Улрајх, Алфонсо Дејвис, Јосуа Кимих и Лирој Сане.
Нивните договори истекуваат во јуни 2025 година, но клубот не планира да им понуди нови, што значи дека ќе се обиде да ги продаде во летниот преоден рок.
Дејвис наводно веќе има договор со Реал Мадрид, Кимих се поврзува со Барселона и Манчестер Сити, а Сане имал понуди од Премиер лигата. Само за Улрајх засега нема интерес.
Кога станува збор за Нојер, Баерн ќе му дозволи да си замине доколку ангажира нов голман. Доколку легендарниот голман инсистира да остане, тогаш ќе мора да прифати да биде резерва.
