Фудбалерот на Ливерпул, Костас Цимикас, ќе отсуствува со месеци поради скршеница на клучната коска која ја заработи синоќа, на бизарен начин, во дербито против Арсенал (1:1).
Како што пишува британски Mirror, Цимикас ја скршил клучната коска при пад што се случил по стартот на играчот на Арсенал, Букајо Сака и судирот со менаџерот Јирген Клоп.
Според весникот, репрезентативецот на Грција ќе паузира најмалку три месеци, можеби и подолго, што значи дека нема да може да настапи за националниот тим во мартовскиот бараж за пласман на ЕУРО 2024.
Mirror додава дека Ливерпул ќе се обиде да ангажира лев бек по Нова година, штом започне преодниот рок, бидејќи од претходно е повреден и Енди Робертсон.
Ливерпул е во игра на четири фронта, стигна до полуфиналето на Лига купот, осминафиналето на Лига Европа, а за две недели стартува во ФА купот, додека во Премиер лигата е во трката за шампионската титула.