Уште од раните денови на пандемијата се водат дебати за тоа колку се корисни маските во спречување на ширење на COVID-19 и кога и колку тие штитат.
Научниците анализираа и докажаа дека маските секако ја намалуваат можноста за ширење на капките, а со тоа и ширењето на вирусот. Исто така, неколку експерти истакнаа дека маските можат да ја намалат концентрацијата на вирусот во воздухот и со тоа вирусното оптоварување на кое ќе бидат изложени здрави луѓе. Истражувања објавени во научни списанија, како што е престижниот Lancet, покажаа дека постои корелација помеѓу изложеноста на вирусот и сериозноста на болеста.
Сепак, во тоа време, студиите се засноваа на искуства со некои други заразни респираторни заболувања, како што е грипот. Подоцна, беа извршени неколку убедливи потврдни студии во врска со COVID-19, но тие главно беа спроведени во лабораториски услови, често на модели или на животни.
Во раната фаза на пандемијата, постоеше недостаток на истражување што би го потврдило ова кај реалното население во кое единствената разлика во примерокот би била тоа што дел од популацијата на земја со слично население, слична култура и слични навики носи маски, а другиот дел не.
Ваква студија конечно беше спроведена деновиве од американскиот универзитет Вандербилт и објавена во вторникот.
Научниците открија дека окрузите во државата Тенеси, кои не вовеле задолжително носење маски, забележале најмалку двојно повисоки стапки на смртност од оние кои барале покривање на лицето.
Во моментов, во областите каде не е задолжително носењето маски, секоја недела се бележат повеќе од четири смртни случаи на 100.000 луѓе, додека во областите каде од летово носењето маски е обврска, стапката на смртност е околу две лица неделно.
Во областите кои рано прифатија задолжително носење маски дури и пред самиот врв на епидемијата во јули и август, стапката на смртност е поблизу до една личност неделно за секои 100.000 луѓе.
На пример, Нешвил, кој ја воведе обврската од крајот на јуни, од март забележа 53 смртни случаи на 100.000 луѓе. Од друга страна, округот Клеј, каде нема обврска да се носи маска, забележа 223 смртни случаи на 100.000 луѓе од почетокот на пандемијата, што е најлоша стапка на смртност во таа сојузна држава.
