Руската фудбалска федерација во вторник ќе донесе одлука дали ќе се повлече од Европската чадор-организација на фудбалот (УЕФА).
Поради инвазијата на Украина, Русија е под санкции, па на тамошната репрезентација и на руските клубови им е забрането учество во натпреварувањата на ФИФА и УЕФА.
„Одлуката секако ќе влијае на тоа како ќе се развива рускиот фудбал во следните 10 години. Иако почнавме да зборуваме за тоа, се договоривме дека прво мора да се анализираат сите можни сценарија и нивните последици“, изјави претседателот на РФС, Александар Ѓуков.
Да потсетиме, Русите беа исфрлени од мундијалските квалификации, а не учествуваат ниту во квалификациите за претстојното ЕП.
Од суспензијата Русија одигра само три натпревари, а тоа беа пријателски со Киргистан, Таџикистан и Узбекистан, додека дуелот со Босна и Херцеговина беше откажан.
Ѓуков додаде дека играњето без знамето и химната е исто така една од опциите и дека за него е поприфатливо од ситуацијата во која сега се наоѓа Фудбалскиот сојуз на Русија.