Инженерите од МИТ и Универзитетот Харвард развија заштитна маска со која може да се утврди во рок од 90 минути дали лицето што ја носи е заразено со коронавирус, објави Институтот за технологија во Масачусетс (МИТ).
Маските имаат вградени сензори за еднократна употреба, кои можат да бидат вградени во други маски за лице, и можат да бидат прилагодени за откривање на други вируси.
Тие се наоѓаат во внатрешноста на маската и можат да детектираат вирусни честички во здивот и се дизајнирани така што корисникот може да ги активира кога е подготвен да го изврши тестот.
За да се заштити приватноста на корисникот, резултатите се прикажуваат само на внатрешната страна на маската.
Развојот на сензори како оние што се користат во новата маска започна пред неколку години. Претходно беа користени за откривање на инфекции со вирусите ебола и зика.
„Овој тест е исто толку чувствителен како и високо чувствителниот PCR-тест, но исто така е брз како тестовите за антиген што се користат за брза анализа на COVID-19“, рече истражувачот на Универзитетот Харвард, Питер Нгуен.
Истражувачите аплицирале за патент за новата технологија и се надеваат дека ќе соработуваат со компаниите за понатамошен развој на сензорот.
„Се надеваме дека оваа платформа може да поттикне нова генерација на носни биосензори за служби за итни случаи, здравство и воен персонал“, рече Џејмс Колинс, професор по медицинско инженерство и наука на МИТ.