Расте бројот на заразени со COVID-19 ширум светот, а милиони луѓе се соочуваат со нови рестрикции и остри мерки со цел да се спречи ширењето на вирусот. Во светот се заразени повеќе од 14 милиони, а починаа околу 600.000 лица.
Од СЗО наведуваат дека ситуацијата со вирусот е сериозна. Директорот на канцеларијата на СЗО во Србија, д-р Маријан Ивануша за РТС рече дека пандемијата сè уште не стивнува.
Околу 20 проценти од заразените имаат тежок облик на болеста
Тој наведе дека околу 40 проценти имаат лесни симптоми, а 20 отсто од заразените лица имаат тежок облик на COVID-19.
„Од тие 20%, 5 отсто се пациенти кои завршуваат на респиратор“, вели д-р Ивануша.
Луѓето се заразни и до три дена пред да развијат симптоми
Доктор Ивануша истакна дека е најважно да се спречи циркулирањето на вирусот и дека луѓето се заразни и до три дена пред да развијат симптоми на COVID-19.
Како што наведува тој, тестирањето, изолирањето и лечењето на заразените лица е најдобар начин за спречување на заразата и додава дека оние кои добиле позитивен тест, треба да ги известаат луѓето со кои биле во контакт за да останат во карантин.
„Нема магичен лек и сè уште нема вакцина. Затоа треба да се почитуваат мерките и да се надеваме дека вакцината ќе пристигне што е можно побргу“, истакнува докторот.
