На азиските берзи цените на акциите паднаа втор ден по ред бидејќи инвеститорите веруваат дека намалувањето на каматните стапки од страна на кинеската централна банка не е доволно за значително да го стимулира економскиот раст.
Индексот MSCI на азиско-пацифичкиот регион беше намален за 0,6 отсто околу 7 часот, откако ослабна втор ден по ред.
Утрово јапонскиот индекс Никеи се лизна за 0,3 отсто, додека цените на акциите во Шангај, Јужна Кореја и Хонгконг паднаа меѓу 0,1 и 1,5 отсто. Во Австралија, пак, тие се зголемени за 0,9 отсто.
Кинеската централна банка утринава ги намали клучните каматни стапки за 0,10 процентни поени за да го поттикне економскиот раст.
Сепак, тоа особено не ги охрабри инвеститорите, кои сметаат дека е потребен целосен пакет фискални и монетарни стимулативни мерки.
Низа неодамнешни податоци укажуваат на значително побавен раст на кинеската економија од очекуваниот по укинувањето на рестриктивните мерки за коронавирусот.
„Веројатно ќе треба да го почекаме состанокот на Политбирото на почетокот на јули за нова рунда од целосниот стимулативен пакет“, вели Родриго Катрил, стратег во Националната австралиска банка.
Внимателни се и инвеститорите поради немањето насока од Вол Стрит, со оглед на тоа што во понеделникот немаше бизнис во САД поради празник.
Американските фјучерси индекси моментално се во блага негатива, што навестува благ пад на цените на акциите на почетокот на денешното тргување на најголемата светска берза.
И на валутните пазари вредноста на доларот во однос на кошницата валути благо порасна втор ден по ред.
Индексот на доларот, кој ја покажува вредноста на американскиот долар во однос на другите шест најважни светски валути, утрово се движи околу 102,50 поени, додека вчера во ова време изнесуваше 102,33 поени.
Истовремено, курсот на доларот во однос на јапонската валута порасна од вчерашните 141,95 на 142,25 јени.
Незначително зајакна и американската валута во однос на европската, па цената на еврото се лизна на 1,0915 долари, додека вчера во овој момент изнесуваше 1,0935 долари.
Цените на нафтата, пак, паднаа по вчерашниот раст. Цената на барелот на лондонскиот пазар утрово се лизна за 0,08 отсто, на 76,05 долари, додека на американскиот пазар цената на барелот се намали за 1,38 отсто, на 70,79 долари.
