Шведскиот актер Долф Лундгрен низ текот на годините има снимено повеќе од 70 филмови, но најмногу е познат по улогата на боксерот Иван Драго во „Rocky IV“. Тој има два брака зад себе и сега е свршен, а можеби и оженет за девојка која е скоро 40 години помлада од него.
63-годишниот Лундгрен ја побара за жена фитнес инструкторката Ема Крокдал во јуни минатата година. Откако на Instagram ја објавија свршувачката наидоа на потсмев и многумина под фотографијата прашуваа дали тоа е ќерка му, со оглед на тоа што има ќерка на нејзина возраст.
Тој призна дека не барал нова врска по „болната“ разделба од бившата девојка Џени Сандерсон во 2017 година, но сепак неговите чувства се промениле откако се запознал со Ема во јули, 2019 година.
Во интервју за Muscle + Health, згодниот актер вели дека не планирал да запознае друга девојка и да почне врска, туку спротивното, сакал да биде сам и да закрепне од претходната љубовна врска.
„Се чувствувам како многу среќен човек што имам некого како Ема на оваа возраст, тоа ми го промени животот и се надевам дека ќе ѝ дадам иста поддршка и помош“, вели тој. „Кога станува збор за тренингот, Ема ме учи работи кои не ги знам бидејќи сега има нов пристап кон фитнесот, а за кој не бев свесен. Кога тренирав со Силвестер Сталоне во 80-тите, тоа беше само основното“.
Додава дека тој и Ема се совршен пар, заедно се надополнуваат и дека таа му го променила животот.
Интересно е што медиумите пишуваат дека актерот е фотографиран со бурма на раката, пишувајќи дека всушност се оженил со скоро 40 години помладата свршеница. Иако веста не е официјално потврдена, парот очигледно не им придава значење на исмевањата и шпекулациите, додека ужива во љубовта.