Поранешниот американски претседател Доналд Трамп доби дозвола да се врати на социјалните платформи Facebook и Instagram, од кои беше избркан поради упадот на неговите поддржувачи во Капитол во 2021 година.
Профилите на Трамп на Facebook и Instagram ќе бидат обновени „во наредните недели“, изјави вчера менаџерот на Meta.
На Трамп веќе му беше овозможено да се врати на неговиот омилен Twitter откако мрежата ја купи иноваторот и мултимилијардер Илон Маск.
„Нашето општо правило е дека не сакаме да застанеме на патот на отворена, јавна и демократска дебата за платформите на Meta, особено во контекст на изборите во демократските општества како што се САД“, напиша претседателот за глобални прашања на компанијата, Ник Клег.
„На јавноста треба да ѝ се овозможи да слушне што имаат да кажат нејзините политичари - добро, лошо, грдо - за да можат луѓето да одлучат за кого да гласаат на изборите“, додаде Клег.
Meta му го укина пристапот на Трамп до профилите на 6 јануари 2021 година, кога стотици поддржувачи на Трамп упаднаа во Капитол и нападнаа полицајци и пратеници додека Конгресот беше на седница за потврдување на изборните резултати.
Основачот на Facebook, Марк Закерберг, тогаш изјави дека се плаши од можноста Трамп со својата реторика да предизвика ново насилство.
Meta најави дека прави „нова заштита за да ја одврати злоупотребата“ во мрежата, вклучувајќи високи казни за прекршителите како Трамп, кој се соочува со двегодишна суспензија доколку ги прекрши правилата на компанијата, кои вклучуваат забрана за поттикнување насилство.
Не е јасно дали Трамп, кој основаше сопствена социјална платформа минатиот февруари, некогаш повторно ќе објави нешто на Facebook или Instagram. Но, 45-тиот претседател на САД сепак ја пофали одлуката на Meta на сопствената мрежа Truth Social Life.
