Првиот пик на НБА драфтот, Виктор Вембанјама, дебитираше за Сан Антонио Спарс во поразот од Далас Маверикс со 126:119.
Младиот Французин остана во сенка на овогодинешниот 12-ти пик на драфтот, Дерек Лајвли, кој во меѓусебниот дуел го надигра новиот кошаркар на Спарс.
Кошаркарот на Далас постигна 16 поени со 10 скока, додека Вембанјама додаде 15 со 5 скока и 2 асистенции.
Словенецот Лука Дончиќ ги предводеше Мавс до победата со трипл-дабл учинок од 33 поени со 13 скока и 10 асистенции, додека Кајри Ирвинг додаде 22 со 6 асистенции и 2 скока. Хардавеј и Вилијамс го завршија натпреварот со по 17 поени и 6 скока, а Хардавеј додаде и 4 асистенции. Двоцифрен беше и Грин со 11 поени и 2 скока.
Најдобар играч за Спарс беше Девин Васел со 23 поени, 5 скока и 3 асистенции, Келдон Џонсон го следеше со 17 поени, 9 скока и 7 асистенции, додека Тре Џонс додаде 16 поени, 6 асистенции и 5 скока. Зек Колинс го заврши натпреварот со 14 поени, 5 скока и 3 асистенции, а Џереми Соухан додаде 13 со 8 скока и 5 асистенции. Двоцифрен беше и Осман со 12 поени и 2 скока.
Брендон Милер беше избран за втор пик од Шарлот Хорнетс и во своето деби во најсилната лига на светот постигна 13 поени со 3 скока и 2 асистенции во победата на неговиот тим против Атланта Хокс со 116:110.
Третиот пик на драфтот, Скот Хендерсон, средбата ја заврши со 11 поени, 4 асистенции и 3 скока во поразот на Портланд Треил Блејзерс од Лос Анџелес Клиперс со 123:111.
Од останатите резултати за издвојување е победата на Бостон Селтикс од 108:104 на гостувањето кај Њујорк Никс со 34 поени, 11 скока и 4 асистенции на Џејсон Тејтум и 30 поени и 8 скока на Кристапс Порзињѓис.
Резултати:
Шарлот Хорнетс - Атланта Хокс 116:110
Индијана Пејсерс - Вашингтон Визардс 143:120
Њујорк Никс - Бостон Селтикс 104:108
Орландо Меџик - Хјустон Рокитс 116:86
Бруклин Нетс - Кливленд Кавалирс 113:114
Мајами Хит - Детроит Пистонс 103:102
Торонто Репторс - Минесота Тимбервулвс 97:94
Чикаго Булс - Оклахома Сити Тандер 104:124
Мемфис Гризлис - Њу Орлеанс Пеликанс 104:111
Јута Џез - Сакраменто Кингс 114:130
Сан Антонио Спарс - Далас Маверикс 119:126
Лос Анџелес Клиперс - Портланд Треил Блејзерс 123:111
