Интер ќе остане лидер во Калчото на полусезона откако во крајно неизвесен натпревар попладнево славеше над Верона со 2:1.
Навидум лесната задача за лидерот почна според планот. Капитенот Лаутаро Мартинес се врати по повредата и уште во 13. минута го отвори резултатот.
Но, несигурната игра пред голот на гостите од градот на Ромео и Јулија резултираше со тоа да нема промена во резултатот во корист на Интер, односно фаворитот со време да не ја осигура победата според планираното.
Казната стигна во 74. минута по еден навидум безопасен напад на гостите кога Тома Анри мајсторски го смени правецот на нафрлувањето од Ондреј Дуда.
Интер немаше идеја како да дојде до победнички гол, а во меѓувреме Марко Арнаутовиќ беше трагичар откако промаши две колосални шанси. Прво, топката на празен гол ја исфрли надвор, а потоа лошо ја процени при скок со глава.
Ерупција на „Меаца“ настана во 2. минута од надополнувањето откако Алесандро Бастони со топовски удар ја затресе пречката, на одбиената топка налета Николò Барела, чиј удар го одбрани Лоренцо Монтипò, но не ја задржа, ја одби кратко за да дојде до нововлезениот Давиде Фратези и тој да ја смести в гол.
Но, тоа не беше крај на драмата. Прво, српскиот играч од средниот ред на Верона, Дарко Лазовиќ, доби црвен картон поради несогласување со главниот судија. Потоа Верона нападна по втор гол, кој за малку ќе го добиеше. При обид да расчисти една топка, Матео Дармјан место топката го шутна Џанџакомо Мањани, а по интервенција на ВАР судијата Мајкл Фабри покажа пенал за Верона во 10. минута од надополнувањето, или вкупно 100. минута од натпреварот.
Стрелецот на израмнувачкиот гол, Французинот Тома Анри, кој дели презиме со славниот француски голгетер Тјери Анри, ја зеде одговорноста и ја стави топката на белата точка, соочувајќи се со швајцарскиот голман Јан Зомер под громогласните свирежи на преполниот стадион. Го надмудри, го испрати на погрешката страна, но лошо ја зафати топката и ја погоди стативата, а неговите соиграчи одбиената топка не успеаја да ја сместат во мрежата.
Со 48 бодови и 5 повеќе од второпласираниот Јувентус, кој утре го игра својот натпревар од ова 19-то коло, Интер ја освои неформалната титула зимски шампион, како што велат на Чизмата.
