Во центарот на Белград вчера со часови траеја конфликтите меѓу полицијата и демонстрантите кои синоќа се собраа пред српското собрание откако претседателот Александар Вучиќ најави воведување полициски час поради влошената епидемиолошка ситуација.
Вучиќ додаде и дека за да се избегне уште полоша ситуација од сегашната, ќе се воведе задолжителна вакцинација против грип.
„Мораме да го избегнеме судирот на коронавирусот и грипот, што значи ќе мора да вакцинираме повеќе од два милиони граѓани против грип. Таа вакцина е задолжителна за војската, полицијата, шалтерските службеници, пензионерите, децата од 3 до 12 години и хронично болните лица. Очекуваме дека најтешкиот бран на коронавирус ќе биде околу први ноември. Пред тоа веќе ќе тргне грипот, затоа мора да го избегнеме мешањето по секоја цена“, истакна тој.
Српските медиуми пренесуваат дека има многу повредени меѓу полицајците и демонстрантите, а повеќе учесници на протестот се уапсени.
Инцидентите почнаа околу 22:15 часот кога група демонстранти, незадоволни од најавата за полициски час, влегоа во Собранието по што интервенираше полицијата.
Демонстрантите беа истерани со солзавец, а во конфликтот меѓу полицијата и учесниците на протестот беа запалени контејнери, полициски автомобили, пластични шишиња, а врз полицајците демонстрантите фрлаа камења и јајца.