Хрватскиот портал Index.hr, водејќи се од добро упатени извори и според досега собраните информации до кои дошле надлежните служби при истрагата, објави дека на загрепски Јарун паднало беспилотно летало.
Нешто по 23 часот синоќа, во Загреб се слушнал силен тресок. Набрзо било откриено дека во близина на студентскиот дом „Стјепан Радиќ“ нешто удрило во земјата и создало голем кратер. Делови од конструкцијата останале во земјата, за кои се покажало дека припаѓаат на летало.
Една од можностите беше дека тоа е објект од вселената, на пример, дел од сателит. Сепак, досегашната истрага укажува дека сепак се работи за беспилотно летало.
Како што дознава Index.hr, со двата падобрана најдени на две локации на Јарун, на повеќе од еден километар од местото на големиот кратер, не слетале луѓе, туку веројатно делови од леталото во кои се чуваат податоци.
Се појавија само неофицијални информации дека во текот на истрагата било утврдено дека на делови од авионот има петокраки и натписи на руска кирилица, но официјална потврда за тоа нема.
Нема потврда за каков дрон се работи.
Експерт за воена авијација: Верувам дека е беспилотно летало Ту-141 и пристигнало од Украина
Но, на тоа прашање можеби одговори Тајлер Роговеј, експерт за воена авијација и уредник на The War Zone на порталот The Drive. Тој напиша дека детално ги проучувал визуелните докази од фотографиите и снимките од Загреб и дека „силно верува“ дека се работи за Ту-141, беспилотно извидувачко летало. Роговеј смета дека дронот Ту-141 се расипал и од Украина ја поминал цела Унгарија или делови од соседните земји, сè до Хрватска.
Објавено е дека Украина лансирала брзи беспилотни летала од советската ера во последните денови по руската инвазија на земјата. Украина е единствениот познат актуелен оператор на Ту-141, пишува Роговеј. Тој вели дека твитерџијата Darkstar_OSINT бил првиот што предупредил за мистериозната несреќа во Загреб и можноста беспилотното летало да е од Украина и дека прегледот на останките и достапните извештаи заклучил дека само едно летало одговара на деловите пронајдени во Загреб и дека тоа е Ту-1421.
Едното крило, пишува тој, останало главно недопрено, што овозможило да се потврди сомнежот дека се работи баш за тој дрон.
„Сепак, фактот што овој дрон одлетал толку далеку од курсот е и збунувачки, и алармантен. Но, тоа не би било прва загуба на Ту-141 во војната. Уште еден падна во Украина пред само неколку дена“, пишува Роговеј.
Ту-141 е фасцинантно парче хардвер од советската ера што Украина го надгради и го искористи по инвазијата на Крим во 2014 година. Леталото е повеќе крстаречки проектил отколку традиционален дрон.
Доколку овие шпекулации навистина се покажат точни, падот на советскиот дрон што се користи во Украина би бил еден од најбизарните настани досега во руско-украинската војна.
