На Светското првенство во Катар денеска ќе се одиграат натпреварите од третото коло во групите Ц и Д, по што ќе бидат познати уште тројца учесници во осминафиналето.
Најпрво од 16 часот на терен ќе излезат четири селекции од групата Д. Франција по две кола обезбеди премин во нокаут фазата, а преостанатите три селекции се борат за второто место кое води во осминафиналето.
Се среќаваат Австралија - Данска и Тунис - Франција. Французите имаат шест бода, Австралија има три, а Данска и Тунис имаат по еден бод.
- Австралија се пласира во осминафиналето со победа над Данска или нерешено, под услов Тунис да не ја победи Франција
- Данска оди во осминафиналето со победа над Австралија, под услов Тунис да не ја победи Франција со поголема разлика од нив
- Тунис оди во осминафинале ако ја победи Франција, и со реми меѓу Австралија и Данска или ако ја победи Франција поубедливо отколку Данска ја победи Австралија.
Од 20 часот се играат натпреварите од групата Ц меѓу Аргентина - Полска и Мексико - Саудиска Арабија, а во игра за пласман понатаму се сите четири селекции. Полска има четири бода, Аргентина и Саудиска Арабија по три, а Мексико има еден бод.
Во оваа група се е отворено, па дури во две сценарија Лионел Меси може да ги спакува куферите и да го заврши своето последно светско првенство со елиминирање во групната фаза од натпреварувањето.
- Полска оди понатаму со победа или нерешено со Аргентина
- Аргентина оди понатаму со победа над Полска. Во случај на реми мора да се надеваат дека Саудиска Арабија нема да го победи Мексико со голема разлика.
- Саудиска Арабија оди во осминафинале со победа над Мексико. Во случај на реми мора да се надеваат на убедлива победа на Аргентина над Полска.
- Мексико оди понатаму ако ја победи Саудиска Арабија, а Полска ја победи Аргентина.
