Американски католички свештеник си поднел оставка откако било откриено дека со децении погрешно ги изведувал крштевањата.
Католичкиот свештеник од Феникс во сојузната држава Аризона самоволно ја напуштил финкцијата откако било откриено дека низ целиот свој свештенички живот употребувал погрешна формула при крштевањето луѓе.
Епископот Томас Олмстед од Феникс ја објавил грешката на средината од минатиот месец. Во своето писмо до парохијата, цитирано од Catholic News Network, напишал дека „крштевањата изведени од Пречесниот Андрес Аранго, свештеник од Епархија на Феникс, се невалидни“.
Своето тврдење епископот го поткрепил со доктринална нота издадена од Ватикан во август 2020 во кој се вели дека формулата „Те крштеваме во името на Отецот и Синот и Светиот Дух“ не смее да се користи при крштевање. Правилната употреба е прво лице еднина наместо множина, односно „Те крштевам“ наместо „Те крштеваме“ како што користел Андрес. И за тоа има соодветно објаснување зошто така треба.
„Проблемот со користењето 'Ние' е тоа што не е заедницата која крштева личност, туку Христос, и само Тој, кој претседава со сите свети тајни, и затоа Исус Христос е тој што крштева“, објаснува епископот. Во кратки црти објаснето - Исус крштева преку свештеникот, затоа треба „Те крштевам“.
Иако Олмстед не го обвинил свештеникот Аранго за грешката која очигледно ненамерно ја направил, сепак Аранго се повлекол од функцијата. Тој во своето проштално писмо напишал дека длабоко жали за грешката и проблемите кои произлегуваат од неа.
Епископот Олмстед ги повика сите оние кои биле крстени од Аранго да го контактираат. Според правилата, личност која не добила правилно крштевање не може да прими света Причест. Засега не е познато како оваа грешка влијае врз склопените бракови.
„Загриженоста за една заменка можеби изгледа легалистичка, но употребата на соодветна форма - зборови, постапки и материјали - е исто толку клучна како и духовниот аспект на светата тајна. Крштевањето е услов за спасение“, вели Олмстед.
