Единствениот македонски фудбалер во најдобрата Бундеслига вели дека оваа сезона се адаптира на начинот на игра, а од наредната ќе го покаже своето вистинско лице.
Елиф Елмас даде интервју за турските медиуми во кое зборуваше за многу работи, а се осврна и на префрлувањето од Калчото во Бундеслигата.
По 4 и пол години минати во градот под Везув, Елмас во јануари замина во тимот на Лајпциг. Причината беше тоа што во Наполи ретко беше во стартниот тим, а најчесто влегуваше како замена.
„Имав успешен период во Наполи, дури иако често бев резерва. Минатата сезона бев трет играч по бројот на асистенции и голови зад Осимхен и Хвича. Се радував на титулата во Серија А, успех кој Неапол го чекаше 33 години, а го кренав и трофејот во Копа Италија“.
По доаѓањето во германскиот прволигаш Елмас запиша само еден настап како стартер, а за тоа вели дека е поради периодот на адаптација на новиот стил на игра.
„Лајпциг е тим кој им дава шанса на младите. Сега сум во период на адаптација на германскиот фудбал. Следната сеозна ќе можете да го видите вистинскиот Елиф Елмас“, рече Елмас.
Пролетниов дел во Лајпциг настапи на 9 од 11-те натпревари, но одигра вкупно само 133 минути. Стартер беше еднаш, пред две недели кога Лајпциг дома го совлада Дармштат со 2:0, но беше заменет на полувреме. Влезе од клупата и на двата натпревара од осминафиналето во Лигата на шампионите против Реал Мадрид.
