Марсело денеска на церемонија полна со емоции се прости од Реал Мадрид каде играше последните 15 години.
Брилијантниот 34-годишен Бразилец едвај врзуваше реченица за реченица додека зборуваше и го напушта Реал како играч со најмногу трофеи (25) во клупската историја.
„Си ветив дека нема да плачам, но навистина е тешко. Благодарам на сите мои соиграчи и тренери, но најголема благодарност до луѓето од обезбедувањето и сите оние луѓе во сенка кои вршат многу валкани работи за нас. Сакам да истакнам колку се важни затоа што ние играчите треба само да играме, тие се грижеа за сè друго“, рече Марсело со солзи во очите и продолжи:
„Кога заминав од Бразил сакав да играм во Лигата на шампионите. Денеска заминувам како најуспешен играч во историјата на најголемиот клуб во светот. Ќе кажам нешто што никогаш не сум го кажал. Посебна благодарност до Раул кој седи овде. Многу ми помогна кога дојдов и кога се роди син ми. Ти и твоето семејство отсекогаш се грижевте за нас, неизмерно сум ти благодарен. Ова беше прекрасна авантура. Дојдов како момче и си заминувам како маж. Ви благодарам на сите“.
Бразилецот дојде во Реал во 2007 година од Флуминенсе за 6,5 милиони евра. За Реал одигра 545 натпревари и постигна 38 гола и 103 асистенции. Има освоено шест титули на Шпанија, два Купа на кралот, пет шпански Суперкупа, пет ЛШ трофеи, четири светски клупски првенства и три европски суперкупа.
