Фудбалската федерација на Македонија упати благодарност до сите навивачи присутни на синоќешниот натпревар против соседна Бугарија на кој „Рисовите“ загубија и ги разочараа бројните навивачи кои 90 минути на дождот навиваа.
Македонија синоќа не успеа не само да победи заради рејтингот, туку и заради честа и гордоста против една земја која константно негува омраза кон македонскиот народ и држава и шири негативна пропаганда исполнета со искривувања на историјата и невистини за денешницата.
По тој повод денеска се огласи и ФФМ која упати јавна благодарност до сите навивачи кои се појавија на Националната арена, а дојдоа од цела Македонија понесени од желбата за победа над оваа соседна репрезентација.
„Драги навивачи,
Од срце упатуваме голема благодарност до сите вас кои дојдовте од сите краеви на Македонија да им дадете поддршка на македонските репрезентативци на Националната арена 'Тодор Проески' на натпреварот против Бугарија.
Беше навистина импресивно да се види како и на дожд, повеќе од 20 илјади луѓе, безусловно ја сакаат и бодрат Македонија. Од првата до последната минута.
На сите ни е жал што репрезентацијата и покрај големиот напор не успеа на крајот да оствари позитивен резултат, но длабоко сме убедени дека ќе бидеме на највисоко ниво на следните натпревари и одново ќе имаме причина за славје пред полни трибини на Националната арена.
До следниот натпревар, напред Македонија“.
