Министерот за здравство Венко Филипче одржа прес-конференција за актуелната состојба со COVID-19 во земјава.
„Сите сме засегнати и како поединци и како држава и сите придонесуваме во решавањето на овој проблем. Целиот овој период кажуваме дека состојбата на здравствениот систем, капацитетите на згрижување на пациенти, големиот број слободни болнички кревети, нискиот број заразени здравствени работници, бројот на слободни респираторни машини, познатите кластери што го потврди оваа интензивна активност во изминатите денови од анализа на контактите и сите други индикатори укажуваат дека точно знаеме што се случува и имаме капацитет да се справиме и со овој бран на болеста“, рече Филипче.
Има суштинска разлика помеѓу првиот и овој бран, нагласи министерот.
„Тогаш не знаевме што може да очекуваме, не знаевме колку може да се прошири вирусот, имаше многу непознати за самиот вирус и не знаевме колку може да го оптовари здравствеениот систем. Сега имаме една друга состојба – имаме знаење, имаме ресурси, имаме сериозно надграден здравствен систем во однос на капацитети и на сместување и на медицинска опрема и во однос на знаење. Тоа е задачата на системот, да биде организиран и подготвен, односно да сме сигурни дека може да се носиме и со овој бран.“
Тој апелираше до сите граѓани да ги почитуваат мерките на лична заштита, протоколите на движење, држење дистанца и ги повика надлежните тоа да го контролираат и да го санкционираат таму каде има прекршување, бидејќи, како што појасни, тоа е единствениот начин да се заштитиме и да го спречиме ширењето на вирусот.
