Марлен Скјапа ќе се појави на насловната страница на новиот број на американскиот магазин Playboy, додека во нејзината земја беснеат протести.
Француската министерка во владата на Емануел Макрон, Марлен Скјапа, ќе се појави на насловната страница на магазинот Playboy. Сепак, таа нема да се појави разголена, туку потполно облечена во интервју што ќе опфати дури 12 страници во француското издание на популарниот американски магазин. Во априлсккиот број Playboy посветува внимание на правата на жените и на ЛГБТК луѓето.
Нејзината одлука да се појави на насловната страница ја критикуваа поедини колеги политичари, кои моментално се соочуваат со немири во јавноста поради пензионерската реформа на Макрон.
Предлогот старосната граница за одење во пензија да се покачи од 62 на 64 години предизвика масовни штрајкови и насилни протести какви што Франција со години нема видено. Пратеничката од редовите на зелените, Сандрин Русо, за ТВ каналот BFM рече: „Каде е почитта кон францускиот народ? За луѓето што ќе мора да работат две години подолго, што демонстрираат, што овие денови нема да бидат платени, што не можат да јадат поради инфлацијата. Немам проблем со тоа женските тела да се изложени било каде, но постои општенствен контекст“.
Француската премиерка Елизабет Борн наводно ја повикала колешката Скјапа за да ѝ каже дека позирањето за насловната страница на Playboy „воопшто не одговара - особено со моменталните околности“. Меѓутоа, Скјапа, кој е и мајка на две деца, ја бранеше својата одлука на Twitter. „Ги бранам правата на жените да прават што сакаат со своите тела: секаде и секогаш. Во Франција жените се слободни. Без разлика дали тоа им пречи на заостанатите и лицемерите или не“, рече таа.
Францускиот уредник на Playboy, Жан-Кристоф Флорентан, рече дека Скјапа „е најкомпатибилна за Playboy“ од нејзините колешки, поради своите феминистички ставови. Изданието на бројот со Скјапа на насловната страница ќе се најде во продажба од 8 април, пренесува францускиот дневен весник Le Parisien.
Скјапа беше авторка и блогерка која се занимаваше со женски прашања, пред Макрон да ја назначи за министерка во 2017 година. Додека беше министерка за еднаквости, воведе закон со кој прозивките и уличното вознемирување се незаконски. Таа, исто така, еднаш ја пофали француската кампања започната на социјалните мрежи во ерата на движењето #MeToo, наречена „expose your pig“.
Министерката Скјапа, која по татко е Корзиканка (оттаму италијанското презиме), има кафен појас во џудо и се декларира како сапиосексуалец. Французите често нејзиното презиме го изговараат и како Шјапа.