Македонската женска сениорска фудбалска репрезентација доживеа убедлив пораз од 0:7 синоќа среде Скопје од моќната Франција.
Голеада и се очекуваше со оглед на сите проблеми со кои се соочи селекторот Кирил Изов. Прво поради повреда отпадна најдобрата фудбалерка Наташа Андонова, а поради суспензија од жолти картони не можеше да игра ниту втората најдобра, Гентјана Рочи. Поради рестрикции поради короната не можеа да дојдат уште две интернационалки, па со домашен состав Изов требаше да истрча против една од топ 10 репрезентациите во светот. Потоа на ден пред натпреварот дури седум фудбалерки излегоа позитивни на COVID-19, па мораше да прави додатни промени „во 5 до 12“.
Како што и се очекуваше, Французинките од почеток ја презедоа иницијативата и контролата на играта, па фудбалот практично се играше на македонската половина.
Головите за Франција ги постигнаа Ожени Ле Сомер во 15. и 19. (пен), Мари-Антоанет Катото во 22., Елиза Де Алмеида во 52. и 90.+3, Марион Торан во 79. и Вивјан Асеји во 83. од пенал.
За Македонија настапија: Панчурова; Живиќ, Коларовска, Јошевска, Положани; Милеска (к); Максути, Шемсовиќ, Мустафа (87' Петровска), Јаковска (90'+3 Велеска); Салихи (81' Чубриновска).
Ова беше петти пораз за Македонија во квалификациите за ЕУРО каде сме на 4. место со 3 бода, единствено пред Казахстан кој има 0.
Наредниот натпревар на македонската репрезентација е повторно против Франција, овој пат на гости и тоа на 23 октомври.
